致葉榮添：
老朋友，自從「無煙城」後你好似消失咗咁，朋友搵你唔到，你亦無再蒲頭。係最近先打聽到你有新發展，活躍喺各個網上平台，扮鬼扮馬吸引觀眾，仲會開live賣下貨。我諗你應該幾enjoy依家概生活？
老實講，我聽到消息一啲都唔驚訝，完全係似你性格會做概事。我諗起你當年研發部電子蟲蟲機，但一直搵唔到投資者注資，卒之你諗到條絕世好橋，就係走上天台扮做傻事，然後吸引記者採訪，再向觀眾介紹電子蟲蟲機。雖然最後你因為等錢使，以賤價賣斷版權俾日本公司，不過都俾人見識到你幾有生意頭腦，係做生意嘅材料。我成日都同朋友講笑，如果舊時網絡世界已經咁發達，天台個次足以令到全世界識得你。
電子蟲蟲事件後，大家都以為你會一沉不起，點知轉個頭你入行做地產經紀，仲好快賺到第一桶金，然後開埋力天建築公司，仲成功創造環保概念嘅「無煙城」。我哋喺「無煙城」開幕禮見面後就無晒你消息，係最近先再知道你新動向。阿添，唔好介意，我聽到唔少朋友都有聲音，話你喺香港好地地，無端端去第二度發展，搞到自己紆尊降貴，淪落到好似做小丑。不過我識嘅葉榮添從來唔打無把握嘅仗，亦係個唔肯認輸嘅人，起「無煙城」都搞得掂，要攻佔網上世界相信難唔到你嘅。
「呢個世界笑貧不笑娼，你行快人一步，無人會笑你，但你行慢一步，就會永遠俾人睇唔起。」呢句說話係你之前講，我一直都銘記於心，做人要終身學習，唔好同時代脫節，你講得出果然做得到！態度正確！
阿添，題外話，你起嘅「無煙城」近期成為香港熱話，好多香港人爭住想搬入去住，樓價亦由去年開始升幅冠絕全港，聞說因為「無煙城」係唯一無受過煙味污染嘅住宅區喎！
Search